Nowe serbske hudźbne produkcije
Hauptinhalt
Nětko wěnujemy so cyle nowym spěwam, našim najnowšim produkcijam.
A to započnjemy z Helenu Hejduškec. Ju wšak hižo ze spěwom "Kak dyrbju dale hić" znajeće, za kotryž je sama hudźbu a tekst napisała. Pola jeje noweho spěwa je to tróšku hinak. Za "Twój kadla" je napisała Marion Fiedlerowa hudźbu a tekst Měrćin Wjenk.
Helena Hejduškec słuša k našim młodym talentam. Cyle hinak Denis Wenzel. 2002 je wón hižo prěnje spěwy za Serbski rozhłós nahrawał a nam wot toho časa swěrny wostał. 21 titulow je so mjeztym nahromadźiło, wóndano stej najnowšej k tomu přišłoj. "Hej šefo" a "Praj hač sym ja błudny" spěwaj rěkatej. Słyšimy nětko druhi spěw, "Praj hač sym ja błudny", za kotryž je Denis Wenzel sam hudźbu napisał. Tekst je wot Milana Grojlicha.
A hdyž smy jónu při našich tak mjenowanych weteranach Serbskeho rozhłosa, potom wězo tež Anna-Maria Bretschneiderec k tomu słuša. Nimale 80 spěwow je dotal za nas nahrawała. Najnowši, prěni - a zawěsće nic posledni - lětuši rěka "Ze mnu pój". Komponowała je jón Susann Himpelowa, za tekst zamołwita je Lubina Hajduk-Veljkovićowa.
Z našej přichodnej nowostku drje dóstanje SG Sněhowka konkurencu. "Kulowski karnewal" je dotal naš póstniski klasikar. Ale štó wě, kak to lětsa budźe? Budyski dźiwadźelnik Jurij Šiman je před krótkim w studiju był, zo by tam "Kulow - helaw" nahrawał. A to wšak hižo titul praji, zo wěnuje so tekst Wernera Měškanka na spěw Marhaty Korjeńkoweje bliskim póstnicam.
Dalšu rozhłosowu premjeru měješe w zymje tež "Serbski młodźinski oktet". To su Helena, Fabian a Sofija Hejduškec, Greta a Thea Čórlichec , Kito Mark, Dawid Wowčer a Błažij Handrik. Jich je sej serbski hudźbny-wšudźebył Měrćin Weclich hromadźe pytał, kiž nětko hižo tři lětdźesatki młodych spěwarjow spěchuje, mjez druhim bě wón dźě něhdy tež za "Myški" a "Bobriju" zamołwity.
Jednu nowostku hišće za was mamy. Józefa Dónata wšak mjeztym znajeće - jeho "Hišće jónu dźěćo być" wot lońšeho prawidłownje pola nas słyšiće. A štóž prawidłownje Serbski rozhłós poska, je zawěsće tež hižo jónu jeho nowy spěw "Daj mi hubku" słyšał. Hudźba je wot Juliana Rutkowskeho a tekst wot Bianki Wjeńcyneje. Potajkim, Józef Dónat z "Daj mi hubku".
